Friday 21 November 2014

Гьиллебаз сикl

Недай затl жагъин тийиз, гьелек хьанвай сикl. Шарагар саламат чкадал фаракъат авуна, мад сеферда ам тlуьн жагъуриз рекье гьатда. Чара авачир: вири къуватдивдини фендигар амалривди са нетижа арадал гъана, шарагар тухарна кlанзавай. Хейлин чкаяр кlурукай хкудай сикl са жанавурдал гьалтда. Миргин шарагдин са пад тlуьнвай жанавурдин кефияр къумбар тир. Агатна сикl адан патав. Са тике як тlалабна, адан еринда пакад юкъуз вичи са къуьр хкида лагьана, хиве кьуна. Са тике тlимил хьуникди тух жанавурди квадарзавай затlни авачир. Рази хьана ам сикlрен шартlунал.

Сад-кьве сят кьван вахтни арадай фенач, сикl мадни жанавурдин патав хтана ахкъатна.
  
- Са тике як мад хце заз, мергьяматлу жанавур дуст. Гьар са тикедай са къуьр хкида за ваз гьа и пака, - эрк квай тегьерда тlалабна сикlре.
  
- Ви кlуф гьатнавай хьтинди я гьа, - сикlрен амалрикай хуш къвезвач жанавурдиз. – Мад вучда кьван, къачу и тикени… Анжах зи кlаникай яд ракъуриз жедач вавай.
  
«Деведин тум чиляй фейи юкъуз сагъ са суьруь къуьрер хкирвал я за ваз, азгъун ягъи», - рикlяй хиялна гьиллебаз сикlре.
  
- Заз икьрар виридалайни багьа я, жанавур дуст, - рикlе сад, мецел масад алаз жаваб гана сикlре.
  
Шарагар тухарнатlани, сикl вич гишила ама. Мад хъфида ам жанавурдин патав. Тухвай кьве тике шарагриз гана, гила вичиз тlуьн патал са тике мад тlалабда ва адан еринда са къуьр артух хкида лагьана, и сефердани сикlре вичин кар аквада.
  
- Им эхиримжи сефер хьурай. Мад захъни амач як. Пака зи пуд къуьр хкваш, - сикl тагькимарна рахкурда жанавурди.
  
Пакадин юкъуз жанавурди саки хурушум жедалди сикl гуьзлемишна, амма ам пайда хьанач хьи, хьанач. Жанавур сикlни адан пуд шараг яшамиш жезвай чкадал фена: абурун лепирарни амач. Кьукьмада акьур жанавур азгъунвилелди сикlрен геле къекъведа, эхирни адаз тамун куллухрай адан шарагар жагъида. Рикl ажугъдив ацlанвай жанавурди сикlрен шарагар тахьай мисална.
  
БАСНЯДИН НАСИГЬАТ: Тапарралди, гьиллебаз амалралди крар туькlуьриз вердиш жемир: садра, кьведра, пудра менфят къачуртlани, вилерай хкведай са югъни алукьда.

Куругъли Ферзалиев Къалажухви

No comments:

Post a Comment