Яран сувар - Ракъин сувар

Лезги халкьдихъ милли суварар гзаф ава: «Цуьквер сувар», «Кьуьгъвер сувар» (Сифте ргал), «КIару»… Амма виридалайни чаз сейли сувар Яран сувар я (йаран кхьенайтIа, гена дуьз тир, вучиз лагьайтIа икI кхьини гафунин суй къалурзавай лишан й хуьзва; и лишандик «экв, яр, ярувал», «хьун, аваз хьун» манаяр ква).

Яр вичихъ гзаф манаяр авай гаф я. Лезги чIала и гафунихъ ихьтин манаяр ава: 1) яру тав; ярувал; 2) рагъ экъечIдайла ва я рагъ акIидайла цавун кIаниз ягъдай тав; 3) рагъ, ракъинин кьуьтхвер тIвар (йар – ра/й/); 4) иер, гуьрчег; иерди, гуьрчегди; 5) кIаниди, багьади, азизди; адахли; 6) лезги йикъарганда гатфарин варцарикай садан тIвар, (21 мартдилай 4 апрелдалди); 7) суварин йугъ; 8) расувал 9) йар алукьун (тIветIвелар куткун, ракъини кана яру хьун); 10) тарцин кIарасдин юкь; 11) яр, ярар йуьзуьр.